Wednesday, October 14, 2009

শংকৰদেৱে লিখা পদ্য

কৰতল কমল কমলদল নয়ন।
ভৱ দৱ দহন গহন বন শয়ন।।
নপৰ নপৰ পৰ শততৰ গময়।
সভয় মভয় ভয় মমহৰ শতভয়।।
খৰতৰ বৰ শৰ হত দশ বদন।
খগচৰ নগধৰ ফণধৰ শয়ন।।
জগদঘ মপহৰ ভৱভয় ভৰণ।
পৰ পদ লয়কৰ কমলজ নয়ন।।


শংকৰদেৱ

অ' মোৰ আপোনাৰ দেশ -লক্ষ্মীনাথ বেজবৰুৱা ( Jatiya Sangeet of Assam )

অ' মোৰ আপোনাৰ দেশ
অ' মোৰ চিকুণি দেশ
এনেখন শুৱলা
এনেখন সুফলা
এনেখন মৰমৰ দেশ।

অ' মোৰ সুৰীয়া মাত
অসমৰ সুৱদি মাত
পৃথিৱীৰ ক'তো বিচাৰি জনমটো
নোপোৱা কৰিলেও পাত ।

অ' মোৰ ওপজা ঠাই
অ' মোৰ অসমী আই
চাই লওঁ এবাৰ মুখনি তোমাৰ
হেঁপাহ মোৰ পলোৱা নাই ।

লক্ষ্মীনাথ বেজবৰুৱা

Tuesday, October 13, 2009

বিশ্বৰ সৰ্বপ্ৰথম আৰু একমাত্ৰ ইংৰাজী-অসমীয়া সতাঁৰ অভিধান

বিশ্বৰ সৰ্বপ্ৰথম আৰু একমাত্ৰ ইংৰাজী-অসমীয়া সতাঁৰ অভিধান

(World’s First And The Only English-Assamese Online Dictionary)

শব্দ (http://www.xobdo.net) বিশ্বৰ সৰ্বপ্ৰথম আৰু একমাত্ৰ ইংৰাজী-অসমীয়া সতাঁৰ (online) অভিধান| ইন্টাৰ্নেটৰ মাধ্যমত সমগ্ৰ বিশ্বতে বিনামূল্যে উপলব্ধ এই অভিধান অসমীয়া ভাষাৰ বাবে এক অভতপূ্ৰ্ব পদক্ষেপ| কোনো মুষ্টিমেয় পণ্ডিতে এই অভিধান ৰচনা কৰা নাই, বৰং ১২,০০ৰো অধিক সাধাৰণ অসমীয়াভাষীৰ এক বিশ্বজোৰা সহযোগিতামূলক প্ৰচেষ্টা এই অভিধানখনে গঢ় লৈ উঠিছে| অসমীয়াৰ বাহিৰেও উত্তৰ-পূৰ্বাঞ্চলৰ বিভিন্ন ভাষা, যেনে- বড়ো, খাছী, মিচিং, টাই, ডিমাচা, কুকি, চাকমা, গাৰো, মনপা, নাগামিজ আদিও এই অভিধানখনত সামৰি লোৱাৰ প্ৰয়াস কৰা হৈছে|

আন অসমীয়া অভিধানৰ তুলনাত শব্দ-ই অত্যাধুনিক তথ্যপ্ৰযুক্তিৰ সহায় লৈ বহুতো সুফল লাভ কৰিছে –

  1. ইন্টাৰ্নেটৰ সহায়ত সমগ্ৰ বিশ্বতেই মূহুৰ্ততে প্ৰকাশ পায়| শকত অভিধান এখন কঢ়িয়াই ফুৰা আৰু তাৰ পৰা কোনো শব্দ বিচাৰি উলিওৱাৰ বিপৰীতে, শব্দ-ই কেই ছেকেণ্ডমানৰ ভিতৰতে বিশ্বৰ যিকোনো প্ৰান্ততে অসমীয়া শব্দৰ অৰ্থ, তাৰ সমাৰ্থক বা বিপৰীত অৰ্থৰ শব্দ যোগান ধৰিব পাৰে|
  2. ইয়াক অবিৰতভাৱে সংশোধন/সংযোজন কৰি থকা হয়| সেয়ে আন অভিধানৰ দৰে নতুন সংকলনৰ বাবে বহু বছৰ অপেক্ষা কৰাৰ প্ৰয়োজন নাই|
  3. ভিডিঅ’, আলোকচিত্ৰ অথবা ধ্বনি সংযোজন কৰিব পৰা যায়|
  4. সবিশেষ তথ্য থকা আন কোনো জালস্থানৰ (website) পৰাসংযোগ (hyperlink) সন্নিবিষ্ট কৰিব পৰা যায়|
  5. ছাইবাৰ-গণতন্ত্ৰৰ (cyber-democracy) প্ৰয়োগ: ইতিমধ্যে উল্লেখ কৰা হৈছে যে আন অভিধানৰ দৰে এই অভিধান মুষ্টিমেয় পণ্ডিতে ৰচনা কৰা নাই| যুগান্তকাৰী ইন্টাৰনেট-প্ৰযুক্তিৰ সহায়ত বিশ্বৰ বিভিন্ন প্ৰান্তত সিচঁৰতি হৈ থকা ১২,০০ৰো (এই সংখ্যা বৃদ্ধি পাই আছে) অধিক অসমীয়া-ভাষী স্বেচ্ছাসেৱকে ভাগ লৈছে এক গঠনমূলক গণতান্ত্ৰিক প্ৰণালীত, য’ত সহযোগিতাৰে সকলোৱে অভিধানখনৰ প্ৰতিটো শব্দ আৰু তাৰ অৰ্থৰ ওপৰত নিজ মত প্ৰকাশ কৰে, আলোচনা-সমালোচনা আগবঢ়ায় আৰু অৱশেষত এক উমৈহতীয়া সিদ্ধান্ত লয়|
  6. শব্দৰ বিভিন্নতা(Word Variation): এই অভিধানত অসমীয়া ভাষাৰ বিভিন্ন উপভাষা যেনে – কামৰূপীয়া, গোৱালপৰীয়া, দৰঙীয়া আদি সন্নিবিষ্ট কৰাৰ ব্যৱস্থা কৰা হৈছে| তদুপৰি এই অভীধানখনত শব্দবোৰক প্ৰাচীন অসমীয়া, কাব্যিক, কথিত, লিখিত, slang, বৈজ্ঞানিক আদি বিভিন্ন ব্যৱহাৰভিত্তিক শ্ৰেণীত শ্ৰেণীভূক্ত কৰা হয়|
  7. বহুভাষিক (Multi-Lingual): শব্দ-ৰ অভ্যন্তৰীণ গাঁঠনি এনেধৰণে তৈয়াৰ কৰা হৈছে যে ই অৰ্থটোক মূল ভেঁটি হিচাপে লৈ সেই অৰ্থ প্ৰকাশ কৰা আন-আন ভাষাৰ শব্দও নথিভূক্ত কৰি ৰাখিব পাৰে| এই গাঁঠনিৰ সুযোগ লৈ উত্তৰ-পূৰ্বাঞ্চলৰ আন ১২টা ভাষাৰ শব্দ সংযোজন কৰাৰ পৰিকল্পনা কৰা হৈছে| ইয়াৰ বাবে এই অন্যান্য আঞ্চলিক ভাষা জনা স্বেচ্ছাসেৱকৰ সহায় বিচৰা হৈছে|
  8. সাধাৰণ শব্দৰ বাহিৰেও এই অভিধানত “Encyclopedic Entry” বিশ্বকোষৰ দৰে খ্যাতনামা ব্যক্তি, স্থান, পুথি, চলচিত্ৰ আদিৰ বিষয়ে সবিশেষ অন্তৰ্ভূক্ত কৰাৰো ব্যৱস্থা কৰা হৈছে|

শব্দ-ই কোনো বিশেষ অভিধান বা চৰকাৰী পৰিভাষাৰ তালিকা মানি চলিব নিবিচাৰে| ই এনে এখন স্বতন্ত্ৰ অভিধান ৰূপে নিজকে সাব্যস্ত কৰিব বিচাৰে, যি ভাষাটিৰ বৰ্তমান ৰূপৰ সঠিক প্ৰতিবিম্ব দাঙি ধৰিব পাৰে| সেয়ে বৰ্তমান সময়ত প্ৰচাৰ-মাধ্যম, কাগজ-আলোচনী, বিখ্যাত লেখক-লেখিকাৰ উপন্যাস, প্ৰবন্ধ আদিত শব্দবোৰৰ কেনেভাৱে প্ৰয়োগ কৰা হৈছে তাক বিশ্লেষণ কৰি শব্দাৰ্থবোৰ সংযোজন কৰে|

বহুতে প্ৰশ্ন কৰে এই অভিধানৰ মালিক বা স্বত্বাধিকাৰী কোন? উত্তৰত ক’ব পাৰি যে ‘Open Source’ নীতিৰ সদৃশ এই অভিধানৰ যি অংশ যি ব্যক্তিয়ে অৰিহণা যোগাইছে তেওঁৱে সেই অংশৰ স্বত্বাধিকাৰী| আনকি প্ৰতিটো শব্দৰ স্বত্বাধিকাৰী সেই শব্দ অৱদান কৰা ব্যক্তিজন| যিহেতু প্ৰত্যেক অসমীয়া জনা ব্যক্তিয়ে ইয়াত শব্দ যোগ দিব পাৰে, সেয়ে প্ৰত্যেকেই ইয়াৰ স্বত্বাধিকাৰী হ’ব পাৰে|

আন এটি প্ৰশ্ন সঘণে শুণা যায় - এই অভিধানৰ কাম সমাপ্ত হবলৈ কিমান দিন লাগিব? আমাক ১০০০০(দহ-হাজাৰ) অসমীয়া শব্দ সংযোজন কৰিবলৈ প্ৰায় দুবছৰ সময় লাগিল| এখন অসমীয়া অভিধানত সাধাৰণতে ৫০০০০ মান শব্দ থাকে| সেই হিচাপে শব্দ এখন পূৰ্ণঙ্গ আভিধানৰ সমকক্ষ হ’বলৈ আৰু কমেও আঠ বছৰ সময় লাগিব| অসমীয়াৰ বাহিৰে আন ভাষাবোৰৰ কথা চিন্তা কৰিলে, এই উত্তৰ দিয়া সহজ নহয়| কিন্তু শব্দ-ক অসমীয়া আৰু আন ভাষা কেইটাৰ এখন খিৰিকি যাৰ সহায়ত আমি ভাষাকেইটিৰ জীৱন্ত ৰূপ চাব বিচাৰোঁ বুলি যদি গণ্য কৰা হয়, তেনেহ’লে ভাষাকেইটি যিমান দিনলৈ এই ধৰণীত থাকিব, সিমান দিন ধৰি আমি এই অভিধান সংশোধন আৰু সংযোজন কৰি থকিব লাগিব|

আহক এই অভিলাষী প্ৰকল্পত যোগ দিয়ক|

Xobdo was born on 10-March-2006. This website was inaugurated on 14-April-2006.

বুলজিৎ বুঢ়াগোহাঁই, প্রচাৰ শাখা, শব্দ

www.xobdo.net

Followers

About Me

My photo
কেৰিয়াৰ আনুষঙ্গিক কথাবোৰৰ বিষয়ে যদি কোনো আগ্রহী ছাত্র-ছাত্রী তথা অভিভাৱকসকলে জানিব বিছাৰে তেন্তে প্রত্যেক শনিবাৰে বিয়লি ৬ বজাৰ পৰা ৯বজাৰ ভিতৰত ফোনত (০৯৪৩৫১-৮৮৬৩০) যোগাযোগ কৰিব পাৰে । ............................................... ২০০০ চনৰ পৰা ইন্টাৰনেট ব্যৱহাৰ কৰি আহিছোঁ । বিভিন্ন ই-মেইল গোট আৰু ছ’চিয়েল নেটৱৰ্কিং চাইটৰ সদস্য । ইন্টাৰনেটৰ যোগেদি সমাজৰ কাৰণে ভাল কাম কৰাজনৰ পৰিচয় ৰাইজৰ আগত দাঙি ধৰিছো আৰু যোগাত্মক খবৰ তথা জানীবলগীয়া তথ্যবোৰ যিমান পাৰিছো ৰাইজৰ মাজত বিলাইছো। এই কামবোৰ কৰি ভাল লাগে। সেইদৰে মনত উদয় হোৱা কিছুমান ভাব বাতৰিকাকত/আলোচনী তথা ইণ্টাৰনেটৰ বিভিন্ন ই-মেইল গোট / ছ’চিয়েল নেটৱর্কিং ছাইটৰ যোগেদি ৰাইজৰ আগত মাজ মাজে দাঙি ধৰিছোঁ আৰু তাৰে কিছুমান নিজেও কার্যকৰী কৰিবলে চেষ্টা কৰিছোঁ। কেতিয়াও ক’তো কোৱা নাই যে এইবোৰ দ্বাৰা অসমখনৰ কিবা সাংঘাতিক পৰির্বত্তন আনিব পাৰিম। ইণ্টাৰনেট পৃথিৱীৰ বাহিৰতো নিজৰ সামর্থ্য , সময় , শক্তি আদি অনুযায়ী যিমান পাৰো মাজ মাজে কৰি আছোঁ আৰু যদি সম্ভৱ হয় আগলৈ নিজৰ ইচ্ছা মতে কৰি যাম বুলি ভাবিছোঁ। --------------------------------- ড° বুলজিৎ বুঢ়াগোহাঁই সহকাৰী অধ্যাপক, যান্ত্রিক অভিযান্ত্রিক বিভাগ, গিৰিজানন্দ চৌধুৰী ইনষ্টিটিউট অৱ মেনেজমেণ্ট এণ্ড টেকন’লজি, গুৱাহাটী-৭৮১০১৭, অসম । ফোন: ৯৪৩৫১-৮৮৬৩০ ৱেবচাইট : http://www.gimt-guwahati.ac.in/